أي حاجة بتتعلمها ليها 3 متطلبات: الطريقة، التكلفة، وإنك تبدأ

أي حاجة عايز تتعلمها في حياتك، سواء تداول، استثمار أو حتى مهارة ملهاش علاقة بأسواق المال، غالبًا محتاجة 3 حاجات:

01- الطريقة

02- التكلفة

03- إنك تبدأ

الموضوع بسيط في شكله، لكن لو عنصر واحد منهم ناقص ممكن تفضل فترة طويلة بتتحرك من غير ما توصل لحاجة.

الطريقة دي ممكن تعتبرها نص المشوار مش لأنها هتوفر عليك المجهود، لكن لأنها هتوفر عليك مجهود بيتصرف في الاتجاه الغلط وده واضح جدًا في التداول.

المشكلة دلوقتي مش إن المحتوى قليل، المشكلة إن المحتوى بقى كتير لدرجة إن المبتدئ ممكن يتوه فيه

كورس تحليل فني، وبعده استراتيجية جديدة، وبعدها فيديو عن المؤشرات، وبعدها شخص تاني بيقولك انسَ كل اللي اتعلمته وابدأ بطريقة مختلفة فتلاقي نفسك بعد شهور عندك عشرات الكورسات والفيديوهات المحفوظة، لكن مش عارف أنت واقف فين

عشان كده قبل ما تبدأ تتعلم، محتاج تعرف:

• إيه اللي المفروض تتعلمه الأول؟

• وإيه المرحلة اللي بعدها؟

• وإيه اللي ناقصك فعلًا بدل ما تعيد نفس المحتوى؟

• وإمتى تنتقل من الدراسة للتطبيق؟

لأن فيه فرق كبير بين إنك تجمع محتوى وبين إنك تتعلم

ممكن واحد عنده 50 كورس ميكونش استفاد زي شخص درس كورسين بس، فهمهم كويس وطبق اللي فيهم

وده من أهم الأسباب اللي خلتني من البداية أحاول أنتقي المحتوى القوي بدل ما أنشر أي كورس وخلاص لأن قيمة المحتوى مش في عدده قيمته في إنه ياخدك من نقطة لنقطة

مش كل مشاهدة تعتبر تعلم

دي نقطة مهمة جدًا، خصوصًا في التداول

ممكن تقضي ساعات بتتفرج على الشارت وهو بيتشرح قدامك وتحس إن كل حاجة واضحةلكن أول ما تفتح الشارت لوحدك، الدنيا تختلف وده طبيعي

لأن التداول مش حاجة تتعلمها بالمشاهدة فقط

في مرحلة معينة لازم توقف فيديوهات وتبدأ تطبق.

حلل بنفسك

اكتب ليه دخلت الصفقة أو ليه رفضتها

راجع النتيجة

وشوف هل المشكلة كانت في تحليلك، ولا في إدارتك للمخاطر، ولا في تنفيذك زي السواقة بالظبط

مهما اتفرجت على حد بيسوق، مش هتتعلم السواقة فعلًا غير لما تمسك الدركسيون المحتوى يوريك الطريق لكن التطبيق هو اللي يعلمك تمشي فيه.

لما حد يسمع كلمة تكلفة، أول حاجة بتيجي في دماغه هي سعر الكورس لكن في التعلم، أغلى تكلفة غالبًا هي الوقت

ممكن يكون عندك محتوى ممتاز متاح مجانًا، لكن عشان تستفيد منه أنت محتاج تدفع وقتك وتركيزك.

كورس مدته 20 ساعة ممكن يكون ببلاش، لكن لو أنت مش مستعد تخصصله وقت، يبقى وجوده عندك ملوش قيمة وده أحد عيوب المحتوى المجاني

بما إنك مدفعتش فلوس ممكن تتعامل معاه كأنه ملوش تكلفة

تحمله وتقول هبدأ بكرة

تحفظ فيديو وتقول هرجعله وبعد فترة يبقى عندك مكتبة ضخمة من الحاجات اللي عمرك ما درستها.

عشان كده حتى لو المحتوى مجاني تعامل مع وقتك كأنه فلوس لو خصصت ساعة للتعلم، خليك موجود في الساعة دي فعلًا مش فيديو شغال وأنت فاتح سوشيال ميديا في نفس الوقت ولا كورس شغال في الخلفية لمجرد إنك تحس إنك بتذاكر

المحتوى المجاني فرصة… استخدمها صح

وجود محتوى تعليمي قوي متاح مجانًا فرصة ممتازة، خصوصًا للشخص اللي لسه في بداية الطريق ومش قادر يدفع مبالغ كبيرة

استغل المتاح

الفكرة إن قلة الفلوس متبقاش حجة تمنعك من إنك تبدأ لكن في نفس الوقت متخليش كلمة "مجاني" تخليك تتعامل مع المحتوى من غير جدية

ودي أبسط خطوة في الكلام، لكنها أصعب خطوة في التنفيذ.

ممكن تكون عارف الطريق وعندك المحتوى وعندك وقت وبرضه تفضل تقول:

هبدأ بكرة

هبدأ من أول الأسبوع

هبدأ لما أفضى

وهنا لازم تفرق بين إنك عايز تتعلم وإنك بدأت تتعلم

الاتنين مش نفس الحاجة

أنت مش محتاج بداية مثالية مش لازم يكون معاك أفضل جهاز أو أفضل كورس أو عشر ساعات فاضية

ابدأ بالمتاح حتى لو بساعة يوميًا المهم إن التعلم يتحول من نية لفعل

متعتمدش على الشغف

في بداية أي مجال جديد، الشغف بيكون عالي

كل حاجة جديدة وعندك استعداد تتفرج وتقرأ وتذاكر لساعات لكن ده مش هيستمر بنفس القوة طول الوقت هيجي وقت تحس فيه إنك واقف مكانك أو إن المعلومات تقيلة أو إن الموضوع أخد وقت أطول مما كنت متوقع عشان كده لازم يبقى عندك سبب واضح يخليك تكمل

اسأل نفسك:

• أنا بتعلم ده ليه؟

• عايز تبني مهارة؟

• عايز تحسن وضعك المادي؟

• عايز تفهم الاستثمار وتدير فلوسك أفضل؟

• عايز توصل لمكان أحسن ليك وللناس اللي مسئول عنهم؟

السبب ده أهم من الحماس.

لأن الحماس بيبدأك لكن وجود هدف هو اللي يخليك تكمل

متستعجلش النتيجة

واحدة من أكبر المشاكل في التداول إن ناس كتير بتتعامل مع مرحلة التعلم كأنها حاجة عايزة تخلص منها بسرعة عشان تبدأ تكسب فتلاقي الشخص بيجري في الأساسيات عشان يوصل للاستراتيجية وبعدين يجري في الاستراتيجية عشان يدخل صفقات حقيقية وفي الآخر يرجع يكتشف إن مشاكله جاية من حاجات أساسية كان مستعجل عليها من البداية

• إدي لنفسك وقتك

• مفيش رقم ثابت يقولك إنك لازم تتعلم في شهرين أو ست شهور أو سنة

• كل شخص عنده ظروف وخبرة ووقت مختلف

• مش مهم تخلص أسرع المهم كل مرحلة تعدي منها تكون فعلًا فهمتها واستفدت منها

• There is no shortcut to success

وأحيانًا أسرع طريق فعلًا هو إنك تبطل تدور على طريق مختصر

لو عندك وقت دلوقتي، استغله

في فترة من حياة الإنسان بيكون عنده وقت أكتر ومسئوليات أقل ومشكلة المرحلة دي إنك غالبًا مش بتحس بقيمة الوقت

تقول:

• لسه بكرة

• ولسه قدامي وقت

لكن مع الشغل والمسئوليات والحياة، ممكن ييجي وقت الساعة الفاضية نفسها تبقى حاجة صعب تلاقيها فلو تقدر النهاردة تخصص ساعة يوميًا تتعلم فيها حاجة ممكن تغير مستقبلك، متستهونش بالساعة دي مش محتاج تحرق نفسك وتذاكر 10 ساعات كل يوم

محتاج نظام تقدر تستمر عليه ساعة كل يوم لمدة طويلة أفضل بكتير من حماس ضخم لمدة أسبوع وبعده توقف

في النهاية

لو عايز تتعلم تداول، فوركس، استثمار أو أي مهارة جديدة، ركز في 3 حاجات:

• اعرف الطريق.

• متتوهش نفسك في مئات المصادر.

• ادفع التكلفةسواء كانت وقت، مجهود أو فلوس وابدأ

لأن أفضل خطة في العالم ملهاش قيمة وأنت لسه مستني الوقت المثالي

المعلومة موجودةوالمحتوى موجود وفي حالات كتير جزء كبير منه متاح بتكلفة بسيطة أو مجانًا لكن مفيش حد يقدر يعمل مكانك آخر خطوة

إنك تبدأ وتستمر وتدي لنفسك الوقت الكافي عشان تتعلم فعلًا

The shortcut is to stop taking shortcuts

لو أنت فعلًا عايز تبدأ في التداول لكن مشكلتك إنك مش عارف تمشي منين ولا تتعلم إيه الأول، إحنا عاملين مسار تداول كامل من البداية لحد مستوى متقدم، مرتب خطوة بخطوة عشان تتعلم كل مرحلة في وقتها من غير ما تتوه بين عشرات الكورسات والمصادر

المسار معمول عشان يختصر عليك أهم جزء اتكلمنا عنه في المقال: إنك تعرف الطريق الصح وتمشي فيه بترتيب واضح.

ابدأ من أول خطوة، امشِ بالترتيب، وركز إنك تفهم وتطبق قبل ما تنتقل للمرحلة اللي بعدها

لو جاهز تبدأ، ادخل على مسار التداول وابدأ رحلتك من البداية لحد الاحتراف.