شروط الأوردر بلوك الصحيح: إزاي تفرّق بين Order Block قوي وضعيف؟
أي حد بيتعلم SMC بيتعلم الـ Order Block في أول أسبوع.
ويرسمه، ويدخل منه… والسعر يكسره ويكمل.
فيرجع يقول: هو الأوردر بلوك ده بيشتغل أصلًا؟
خليني أقولك الحقيقة: الأوردر بلوك بيشتغل. بس مش كل أوردر بلوك.
الشمعة اللي انت رسمتها ممكن تكون شكلها صح، بس مكانها غلط. وفي المقال ده هنعدّي على الشروط اللي بتفرّق بين Order Block تقدر تعتمد عليه، وOrder Block هيضرب الاستوب بتاعك.
يعني إيه Order Block أصلًا؟
التعريف المعروف: الـ Order Block هو آخر شمعة صاعدة قبل الهبوط، أو آخر شمعة هابطة قبل الصعود.
يعني لو حصل انفجار سعري لتحت، بندوّر على الشمعة الصاعدة اللي قبله. ولو حصل انفجار لفوق، بندوّر على الشمعة الهابطة اللي قبله.
وفي SMC بنقول إن المكان ده هو المكان اللي صناع السوق دخلوا منه. ولو مش فاهم مين صناع السوق دول، اقرأ الأول مقال الأموال الذكية.
لو عايز المقدمة البسيطة للأوردر بلوك، هتلاقيها في مقال أفضل طريقة لاستخدام الأوردر بلوك. المقال ده هيدخل في التفاصيل.
إزاي ترسم الـ Order Block صح؟
الطريقة التقليدية إنك ترسم آخر شمعة عكس الحركة. ده اللي أي حد بيتعلم SMC أو ICT بيعمله.
لكن أنا من وجهة نظري فيه طريقة أدق:
الأوردر بلوك هو الشمعة اللي حصل بعدها FVG مباشرة.
يعني آخر شمعة قبل الحركة القوية اللي سابت وراها منطقة عدم توازن (Imbalance).
وهتقولي: طب ما الشمعة دي طلعت صاعدة، مش هابطة!
أقولك: مش شرط. في الطريقة دي لون الشمعة مش هو المهم. المهم إن يحصل بعدها FVG، وتكون هي آخر شمعة قبل الانفجار.
ولو الشمعة اللي انت رسمتها ما حصلش بعدها FVG؟ يبقى بلاش ترسمها أوردر بلوك من الأساس.
شروط الأوردر بلوك الصحيح
الشرط الأول: يكون بعده FVG
ده بالنسبة لي مش مجرد عامل قوة، ده شرط أساسي عشان أسميه أوردر بلوك أصلًا.
وخد بالك من تفصيلة مهمة: لو السعر رجع غطّى الـ FVG اللي بعد الأوردر بلوك، يبقى خلاص. الـ FVG اتسحب، والأوردر بلوك ده ما بقاش محسوب.
الشرط التاني: يكون في نفس الاتجاه العام
لو الاتجاه العام صاعد، مش هتعتمد على أوردر بلوك بيعي. حتى لو شكله مثالي.
ليه؟ لأنك كده بتدخل ضد الاتجاه، واحتمال كبير السعر يضرب الاستوب ويكمل.
الاتجاه العام بنحدده من بنية السوق. ولو حصل CHOCH داخلي بس، والاتجاه العام لسه صاعد، يبقى لسه بندوّر على أوردر بلوكات شرائية.
الشرط التالت: يكون عند قمة أو قاع قوي
أحسن مكان للأوردر بلوك هو عند القمم والقيعان القوية.
طب إزاي القاع يبقى قوي؟ لما يكون سحب سيولة قاع ضعيف قبله.
يعني السعر نزل تحت قاع داخلي، أخد الاستوبات اللي تحته، ورجع. القاع الجديد ده بقى قاع قوي، والأوردر بلوك اللي عنده بقى أوردر بلوك قوي.
والعكس: أوردر بلوك عند قمة ضعيفة لسه ما سحبتش سيولة، يبقى أوردر بلوك ضعيف.
وده بالنسبة لي أهم شرط في الشروط كلها.
الشرط الرابع: السيولة تكون في صفه، مش ضده
فيه حاجتين هنا:
سيولة اتسحبت قبل ما الأوردر بلوك يتكوّن: ده بيقوّيه.
سيولة في الطريق للأوردر بلوك: لو السعر في طريقه للأوردر بلوك سحب سيولة كمان، يبقى صانع السوق أخد "وقود" قبل ما يلمسه. سيولة اتسحبت تحته وسيولة اتسحبت فوقه، يعني قوة فوق قوة.
والحالة اللي لازم تبعد عنها: أوردر بلوك ضد اتجاه سحب السيولة.
مثال: على فريم الأربع ساعات الاتجاه صاعد، والسعر سحب سيولة قاعين تحت. هنا حتى لو لقيت أوردر بلوك بيعي على فريم الساعة شكله ممتاز، ما ينفعش تعتمد عليه. السعر احتمال كبير يطلع ويكسره.
الشرط الخامس: يكون لوحده في الموجة
لو الموجة الواحدة فيها 3 أو 4 أو 5 أوردر بلوكات ورا بعض، يبقى عندك مشكلة.
هتعتمد على أنهي واحد فيهم؟
القاعدة اللي بمشي بيها:
أول أوردر بلوك في الموجة غالبًا سيولة. أغلب المتداولين بيدخلوا منه وحاطين الاستوب تحته، فالسعر بينزل يسحب الاستوبات دي. ده اللي بنسميه Smart Money Trap.
لو لازم تختار، اختار الأخير (Extreme). آخر أوردر بلوك في الموجة هو الأقرب إنه يتحترم.
والأحسن إنك تكبّر الفريم. لو الفريم ده مليان أوردر بلوكات، اطلع لفريم أعلى لحد ما يبقى عندك أوردر بلوك واحد، أو اتنين بالكتير.
الشرط السادس: المسافة تكون معقولة
الأوردر بلوك ما يكونش بعيد أوي عن السعر الحالي، وبينه وبين السعر شموع كتير وقمم وقيعان. كل ما المسافة تبعد، كل ما يدخل في النص عوامل تانية تغيّر الصورة.
وكمان خد بالك من مكانه بالنسبة لـ Premium وDiscount: البيع من مناطق Premium، والشراء من مناطق Discount.
إمتى تقول إن السعر احترم الأوردر بلوك؟
مش مجرد إن السعر لمسه وارتد شوية.
السعر يبقى احترم الأوردر بلوك الشرائي لما يرتد منه ويعمل قمة جديدة. ولو بيعي، لما يرتد منه ويعمل قاع جديد.
لو ارتد شوية وبعدين رجع كسره، يبقى ما احترموش.
الفرق بين الأوردر بلوك ومنطقة العرض والطلب
السؤال اللي بيتسأل أكتر حاجة.
منطقة الطلب أو العرض هي المنطقة كلها، يعني مجموعة الشموع اللي حصل فيها تجميع قبل الحركة. لكن الأوردر بلوك شمعة واحدة جوه المنطقة دي.
يعني إحنا بنصغّر منطقة العرض والطلب عن طريق الأوردر بلوك.
والفايدة؟ لو دخلت من أول منطقة العرض كلها، الاستوب بتاعك هيبقى كبير. لكن لو دخلت من الأوردر بلوك، الاستوب أصغر بكتير، والـ Risk Reward أحسن بكتير.
وعلى فكرة، منطقة العرض والطلب نفسها بتتقيّم بنفس الشروط: FVG بعدها، وفي اتجاه الاتجاه العام، وعند قمة أو قاع قوي. ولو عايز تفهم الفرق بالتفصيل بين Order Block وSupply & Demand وOrder Flow، اقرأ مقال الفرق بين Order Flow وSupply & Demand.
أنواع الأوردر بلوك: هل الأسامي مهمة؟
هتسمع أسامي كتير: Mitigation Block وUnmitigated Block وRejection Block وغيرهم.
أنا بصراحة ما بحبش أدخل في الأسامي دي، لأنها بتلخبط أكتر ما بتفيد. أهم نوعين تعرفهم:
الأوردر بلوك العادي: الشمعة كلها.
الـ Rejection Block: لو الشمعة ليها ذيل طويل سحب سيولة وقفل قوي، فيه ناس بتحدد الذيل بس كمنطقة دخول.
لكن الفكرة كلها مش في الاسم. الفكرة في مكان الأوردر بلوك، وتأثير السيولة عليه، والاتجاه اللي هو فيه.
يعني إيه Flip Zone؟
الـ Flip Zone هي منطقة طلب فشلت فاتقلبت منطقة عرض، أو العكس.
السعر نزل لمنطقة طلب، عمل رد فعل وطلع شوية، لكن ما قدرش يعمل قمة جديدة. بعدها نزل وكسر المنطقة. هنا منطقة الطلب دي فشلت، واللي اتكوّن مكانها منطقة عرض.
لما السعر يرجع يطلع لها، احتمال كبير يرتد منها ويكمل هبوط. ولو الـ Flip Zone دي كمان سحبت سيولة قمة داخلية، تبقى أقوى.
هل الأوردر بلوك مضمون؟
لا. مفيش حاجة 100% في التداول.
حتى الأوردر بلوك اللي جامع كل الشروط ممكن يتكسر. الشروط دي بتعلّي الاحتمال، مش بتضمن النتيجة. والأوردر بلوك لوحده مش سيت أب كامل. لازم تدمجه مع السيولة وبنية السوق، وتحترم إدارة رأس المال.
الخلاصة
الأوردر بلوك مش أي شمعة عكس الحركة.
الأوردر بلوك الصحيح: بعده FVG، وفي نفس الاتجاه العام، وعند قمة أو قاع قوي، والسيولة في صفه، ولوحده في الموجة.
لو الشروط دي مش موجودة… سيبه وشوف غيره.
لو عايز تشوف الشروط دي مطبقة على الشارت خطوة بخطوة، اتفرج على درس الأوردر بلوك مش منطقة طلب ودرس الأوردر بلوك 2.0 على قناة WolfCharts على يوتيوب. وطبّق، وابعتلي الشارت بتاعك على قناة تليجرام وأنا أرد عليك.